Versi di Salvatore Di Giacomo
Musica di Mario Costa (1885)
Era de maggio e te cadeano 'nzino
a schiocche a schiocche li ccerase rosse,
fresca era l'aria e tutto lu ciardino
addurava de rose a ciente paese.
Era de maggio, io, no, nu me ne scordo,
na canzone cantavamo a doie voce,
cchiù tiempo passa e cchiù ne n'allicordo,
fresca era l'aria e la canzone doce.
E diceva: Core, core!
Core mio! Luntano vaie;
tu me lasse, io conto l'ore,
chi sa quanno turnarraie!
Rispunneva io: "Turnarraggio
quanno tornano li rrose,
si stu core torna a maggio
pur'a maggio io stonco ccà".
E so' turnato e mò, comm' a na vota
cantammo nzieme la canzone antica:
passa lu tiempo e lu munno s'avota;
ma ammore vero, no, nun vota viche.
De te, bellezza mia, m'annammuraie
si t'allicuorde, nnanze a la funtana,
l'acqua là dinto nun se secca maie
e ferita d'ammore nun se sana.
Nun se sana, ca sanata
si se fosse, gioia mia,
mmiezzo a s'taria mbarzamata
a guardarte io nu' starria!
E te dico: Core, core!
Core mio! Turnato io so';
torna maggio, e torna amore,
fa de me chillo che buò.