MMIEZ' 'O GGRANO

versi di Edoardo Nicolardi
musica di Evemero Nardella (1909)

E 'a sera, sott' 'o pàsteno
d' 'e mmele annurche, passa
'stu core sempe giovane
che ride e ch'arrepassa...
E 'a luna pazziannose
no ramo e n'atu ramo
'nterra, cu 'e file d'evera,
ricama nu ricamo...

Oi Stella Stè, ch'aspiette nu signale,
'o ggrano ammaturato è culor d'oro.
E 'sti capille touie so' tale e quale!...
E 'o ssai ca me ne moro
si, mmiezz' 'o ggrano, nun mm"e ffai vasà.

Quanno 'e marite dormono,
stracqu 'e fatica ancora,
ll'ammore, ca stà pesole
sceglie 'a quartata 'e ll'ora...
St'arille comme càntano
sotto a 'sta Luna chiara!
E comme addora 'o ccànape
pe' ttuorno a 'sta pagliara...

E tu non duorme... È inutile,
'stu cuore tuoio me sente
quanno, pe' sott' 'a ll'albere,
passo annascostamente...
E ghiésce fora, pàllida
bella comm'a nisciuna...
E 'a luna, zennianno ce
cuffèa, 'sta mpesa 'e Luna!

Note

Mmiez' 'o ggrano (Roberto Murolo)