Zampugnaro 'nnammurato

Versi e musica di A. Gill (1924)

Nu bello figliulillo zampugnaro,
Ch'a Napule nun c'era stato ancora
Comme chiagneva nnante a lu pagliaro
Quanno lassaje la nnammurata fora.
E a mezanotte, ncopp'a nu traino
Pe Napule partette d'Avellino...
Ullero, Ullero,
Buono e sincero,
Da lu paese a Napule arrivato,
Nce cammenava comm'a nu stunato.

E succedette ca, 'na bella sera
Iett''a sunà a 'na casa 'e 'na signora,
Tappete, luce, pavimente a ccera
Ricchezze maie nun viste 'nfin' allora;
Ma se ncantaie cchiù assaje de sti ricchezze,
Pe ll'uocchie d''a signora e pe lì ttrezze.
Ullero, Ullero,
Fuje nu mistero.
Quanno iette pe' vasà 'a signora 'e mane
"Zitto, - sentett''e dì: viene dimane!..."

Cielo, e comme fuje doce 'sta nuvena
Ca l'attaccaje cu n'ata passiona,
E se scurdaje d'ammore 'e Filumena
Ch'era faticatora e bbona bbona;
Ma ll'urdema jurnata ca turnaje,
Chella signora, 'a casa 'un ce 'a truvaie.
Ullero, Ullero,
Sturduto overo,
Avette ciente lire e 'sta mmasciata:
Scurdatevella, chella è mmaretata...

Na casarella mmiez''a li muntagne,
Nu fuculare cu nu cipp''e pigne,
'A neve sciocca e na figliola chiagne:
Chi sa stu lietto 'e sposa si se ncigne.
P''a strada sulitaria d'Avellino
Nu' sta passanno manco nu traino...
Ullero, Ullero,
Cagne penziero:
Sta sott'a nu barcone appuntunato
Povero zampugnaro 'nnammurato!...