'E palumme
Versi di Oscar Gallo
Musica di Mario Persico (1913)
Miezjuorno. Coce 'o sole,
e vuje state 'int' 'o ciardino,
sott' 'e ffronne 'e mandarine,
'nmiez' 'o ghianco d' 'e llenzole,
spase 'o sole...
E 'na chiorma 'e palummielle
vola vola attuorno a vvuje,
ca lle date 'e mmullechelle...
Spuzzulea. Po' se nne fuje
chesta chiorma 'e palummielle...
Accussì, pe' 'sta passione ca mme struje,
volano sempe, colano
tutt' 'e penziere mieje attuorno a vvuje!
Ma pecchè, sbattenno 'e mmane,
ma pecchè vuje n' 'e ccacciate
'sti palumme aggraziate,
mentre po' lle date 'o ppane,
'nmiez' 'e mmane?...
Se nne vanno ncopp' 'o mare,
p' 'e mmarine, a dduje a dduje,
'ncopp' 'e titte, 'e campanare,
e po' tornano a ddu vuje...
Se nne vanno ncopp' 'o mare...
Accussì, pe' 'sta passione
ca mme struje,
si nn' 'e ccacciate, tornano
tutt' 'e penziere mieje attuorno a vvuje!