Versi di Salvatore Di Giacomo
Musica di Mario Costa (1886)
Carmè, quanno te veco
Mme sbatte 'o core!
Dimmelo tu ch'è chesto
Si nun è ammore?
Chest'è ammore,
oilì, oilà!
E dincello a mamma toia,
si te vo fa mmaretà.
(Coro):
Carmè, dincello,
nu bello maretiello
è sempe buono.
Si no tu rieste sola,
sola, sola,
e lariulà!
'A verità ce vo' na cumpagnia!
Comm'acqua a la funtana
Ca nun se secca,
l'ammore è na catena
ca nun se spezza.
Nun se spezza,
oilì, oilà!
Si se spezza… bonasera,
nun se pò cchiù ncatenà!
(Coro):
Carmè, tu 'o ssiente?
nu bello maretiello
è sempe buono.
Si no tu rieste sola,
sola, sola,
e lariulà!
'A verità ce vo' na cumpagnia!
Stu core aggio perduto
mmiezzo a na via!
Tu certo l'haie truvato
Bellezza mia!
L'haie truvato,
oilì, oilà!
L'haie truvato e l'annascunne,
ma vengh'io pe m''o piglià!
(Coro di donne):
Carmè, dancillo,
nu bello maretiello
è sempe buono.
Si no tu rieste sola,
sola, sola,
e lariulà!
'A verità ce vo' na cumpagnia!