Versi di Giambattista De Curtis
Musica di Vincenzo Valente (1894)
Se dice che a Tuleto nc'è 'na rosa
che cchiù d''o sole li bellizze tene.
E' sempe fresca e sempe cchiù addurosa;
tanta ch'o bella chi v''o po' cuntà!
I' nun voglio gran cosa
i' nun cerco nu regno;
ma vurria chella rosa
sulamente addurà.
I' se tenesse 'a voce e 'o pocco 'e sorte
me facciarria sentì cu sta canzone:
Ninuccia mia, pe' te ne piglio 'a morte,
stu core nun se vo' capacità.
I' nun voglio gran cosa
i' nun cerco nu regno;
ma vurria chella rosa
sulamente addurà.
I' passo pe' Tuleto tutte 'e ssere
'a guardo e nun me stanco d''a guardà
'a penzo e nun me lassa stu penziere…
e doppo muorto chi s''a vo' scurdà!
I' nun voglio gran cosa
i' nun cerco nu regno;
ma vurria chella rosa
sulamente addurà.