Versi di ignoto
Musica di Giacobbe Di Capua
Tiene na rosa 'nfronte,
ch'aggraziata è tanto,
chiena d'addore e ncanto,
che pace non me dà.
Ma io saccio che t'è cara
sta rosa che t'abbella;
dammè dammè dammella,
non me fa cchiù aspettà.
Pecchè ne sì gelosa,
gelosa de no sciore?
Non saie che vista e addore
subeto se ne va!
Almeno, Nenna mia,
dammene na fronnella;
dammè dammè dammella,
non me fa cchiù aspettà!
Tu dire me potraje
portame a fa la zita,
tanno porzì la vita
sto core te darà!
Ma coppa a sta grillana
voglio sta rosa bella…
dammè dammè dammella,
e poi jammo a sposà!