Versi e musica di E.A.Mario (1913)
'Sta funtanella
-ca mena 'a tanto tiempo l'acqua chiara -
ha fatto 'a chiù 'e nu secolo 'a cummara:
piccerenella,
venete 'a nonna a vèvere, e ce steva
nu figliulillo, a ll'ombra, ca 'a vedeva...
E' all'ombra, tutt' 'e dduje
accuminciaieno a se parlà cu 'o ttu... -
E' sempe cumpiacente,
'sti ffronne allegramente
facevano "ciù-ciù..."
Po' ce venette
pur'io 'na vota ca stevo arzo 'e sete
e ca cercavo 'e vvie fresche e cujete
E te vedette,
e t'accustaste e m'accustaje pur'io,
e 'o core tujo cercavo 'o core mio...
Venettemo 'a doje strate
e pe' una ce sperdettemo abbracciate,
pe' ce vasà, pe' nun ce lassà cchiù...
e' sempe cumpiacente,
'sti ffronne allegramente
facevano "ciù-ciù..."
Quant'ate appriesso,
dopo tante e tant'anne venarranno?
Quant'ate matremmonie se farranno?
Mo fanno 'o stesso
quase tutt' 'e ffigliole 'e stu paese,
e 'a sprucete ca sò, po' so' curtese...
E' spicialmente 'a state,
aspettano 'e figliule nnammurate
e sta funtana attacca 'a giuventù...
e' sempe cumpiacente
'sti ffronne allegramente
ce fanno stu "ciù-ciù..."
Funtana all'ombra (Roberto Murolo)
