Versi di Salvatore Di Giacomo
Musica di Enrico De Leva (1888)
Nu juorno mme ne iette da la casa
ienno vennenno spingule frangese.
Me chiamma na figliola: - Trase, trase!
Quanta spingule daie pe nu turnese?
E i' che songo nu poco veziuso,
subbeto me mmuccaie dint'a sta casa…
Ah, chi vo' belli spingule frangese!
Ah, chi vo' belli spingule, ah, chi vo'!…
Dich'io: - Si tu mme daie tre o quatto vase,
te dongo tutt''e spingule frangese…
Pizzeche e vase nun fanno pertose,
e può ienghere 'e spingule 'o paese.
Sentite a me, ca pure 'mparaviso
'e vase vanno a cinco nu tornese.
Ah, chi vo' belli spingule frangese!
Ah, chi vo' belli spingule, ah, chi vo'!…
Dicette: - Core mio, chist'è 'o paese
ca se ti prore 'o naso muore acciso!
E i' rispunnette: - Agge pacienza, scuse:
'a tengo 'a nnammurata, e sta 'o paese…
E tene 'a faccia comme 'e fronne 'e rosa,
e tene 'a vocca comme a na cerasa!…
Ah, chi vo' belli spingule frangese!
Ah, chi vo' belli spingule, ah, chi vo'!…