Versi di Salvatore Di Giacomo
Musica di Mario Costa (1893)
Marzo: nu poco chiove
e n'ato ppoco stracqua
torna a chiovere, schiove;
ride 'o sole cu ll'acqua.
Mo nu cielo celeste,
mo n'aria cupa e nnera,
mo d''o vierno 'e tempeste,
mo n'aria 'e primavera.
N'auciello freddigliuso
Aspetta ch'esce 'o sole,
ncopp''o terreno nfuso
suspirano 'e viole…
Catarì, che vuò de cchiù?
Ntienneme, core mio,
Marzo, tu 'o ssaie, si' tu,
e st'aucielle songo io.