Serenata napulitana

Versi di Salvatore Di Giacomo
Musica di Mario Costa (1897)

Dimme, dimme, a chi pienze assetata,
sola, sola, addereto a sti llastre?
Nfaccia 'o muro 'e rimpetto stampata
veco n'ombra, e chest'ombra sì tu!

Fresca è 'a notte: na luna d'argiento
saglie 'ncielo e cchiù ghianca addeventa,
e nu sciato, ogne tanto, d''o viento
numiez'a st'aria se sente passà…

Ah, che notte, ah, che notte!…
Ma pecchè nun t'affacce?
Ma pecchè, ma pecchè mme ne cacce
Catarì, senza manco parlà?

Ma ce sta nu destino
e io ce credo e ce spero…
Catarì, nun è overo:
tu cuntenta nun sì!…

Catarì, Catarì, mm'è lassato,
tutto nzieme st'ammore è fernuto,
tutto nzieme t'è scìveto a n'ato,
mm'hè schiantato e mm'hè ditto bonnì!

E' a chist'ato ca mo tu vuo' bene,
staie penzanno e, scetata, ll'aspiette;
ma chist'ato stasera nun venerdì e
maie cchiù, t''o ddich'i', venarrà!

No! Nun vene, nun vene…
L'aggio visto p''a strata
cammenà, core a core cu n'ata
e, rerenno, parlaveno 'e te…

Tu si' stata traduta!
Tu si' stata lassata!
Tu si' stata 'nchiantata!
Pure tu! Pure tu!…