Versi di Salvatore Di Giacomo
Musica di F.P.Tosti (1885)
Quanno sponta la luna a Marechiaro,
pure li pisce ce fanno ll'ammore;
se revocano ll'onne de lu mare,
pe' la prezza cagneno culore,
quanno sponta la luna a Marechiaro.
A Marechiaro ce sta 'na fenesta
'a passiona mia ce tuzzuela
'nu carofano adora int'a 'na testa,
passa ll'acqua pe' sotto e murmurella…
A Marechiaro ce sta 'na fenesta.
Chi dice ca li stelle so' lucente
nun sape st'uocchie ca tu tiene nfronte,
sti ddoie stelle li ssaccio io sulamente:
dint'a lu core ne tengo li pponte…
Chi dice ca li stelle so' lucente?
Scètate, Carulì, ca ll'aria è doce!
Quanno maie tantu tempo aggio aspettato?
P'accumpagnà li suone cu la voce,
stasera 'na chitarra aggio purtata…
Scètate, Carulì, ca ll'aria è doce!