La tarantella
Musica di De Lauzieres
Versi di Florimo
Iammo a bedere nterra a l'arena
mente che spanfia la luna chiena
ch'è notte e pare fosse matina
li pescatore de Margellina,
che te combinano friccicarella
la tarantella, la tarantella!
N'ommo e na femmina mmiezo se fanno
a fa rociello le gente stanno,
ma co malizia lo pescatore
mentre ch'abballa sà fa all'ammore.
Non è sortanto pazziarella
la tarantella, la tarantella!
Isso la 'nvita, chell'è scornosa,
pò fa la spruceta, pò n'è gelosa,
pò c'è l'appicceco, 'nguerra se stace,
pò s'addenocchiano, pò fanno pace.
Tutto specifica polita e bella
la tarantella, la tarantella!
Ah! vorria essere no marinaro
E chillo spasso ch'è tanto caro
mmiezo a sta Chiaja ch'è no piacere
nche pigliarriamo tutte le ssere!
Pò vedarrise si non è bella
la tarantella, la tarantella!