Lo guarracino che jeva pe' mmare
lle venne voglia de se nzorare
Se facette no bello vestito
de scarde de spine pulito pulito
co na perrucca tutta ngrifata
de ziarelle mbrasciolata
Co lo sciabo' scolla e puzine
de ponte angrese fine fine.
Cu li cazune de rezza de funno
scarpe e cazette de pelle de tunno,
e sciammeria e sciammerino
d'aleche e pile de voje marino,
cu buttune e buttunera
d'uocchie de purpo, secce a fera,
fibbia, spata e schiocche ndorate
de niro de secce e fele d'achiata.
Ddoie belle cateniglie
de premmone de conchiglie,
no cappiello aggallonato
de codarino d'aluzzo salato
tutto posema e steratiello,
jeva facendo lo sbafantiello,
gerava da ccà e da llà
la nnamorata pe' se trovà.
La Sardella a lo barcone
steva sonanno lo calascione;
e a suone de trommetta
jeva cantanno st'arietta:
"E llare' lo mare e lena
e la figlia d"a si' Lena
ha lassato lo nnammorato
pecchè niente l'à rialato".
Lo Guarracino 'nche la guardaje
de la Sardella s'annammoraje;
se ne jette da na Vavosa
la cchiù vecchia maleziosa;
l'ebbe bona rialatta
pe' mmanarle la mmasciata:
la Vavosa pisse pisse
chiatto e tunno nce lo disse.
La Sardella 'nch' 'a sentette
rossa rossa se facette,
pe' lo scuorno che se pigliaje
sotto a no scuoglio se 'mpiazzaje;
ma la vecchia de la Vavosa
subeto disse:"Ah schefenzosa!
De sta manera nun truove partito
ncanna te resta lo marito.
Se aje voglia de t'allocà
tanta smorfie non aje da fà
fora le zeze e fora lo scuorno,
anema e core faccia de cuorno".
Ciò sentenno la si' Sardella
s'affacciaje a la fenestella,
fece n'uocchio a zennariello
a lo speruto nnammoratiello.
Ma la patella che steva de posta
la chiammaje faccia tosta,
tradetora, sbrevognata,
senza parola, male nata,
ch'aveva nchiantato l'Alletterato
primmo e antico nnammorato,
de carrera da chisto jette,
e ogne cosa lle dicette.
Quanno lo ntise lo poveriello,
se lo pigliaje Farfariello;
jette a la casa, s'armaje a rasulo
se carrecaje comm' 'a no mulo
de scoppette e de spingarde,
povere, palle, stoppe e scarde,
quattro pistole e tre bajonette
dint'a la sacca se mettette.
'Ncopp' 'a li spalle sittanta pistune,
ottanta bomme e novanta cannune;
e comm''a guappo Pallarino
jeva trovanno lo Guarracino,
la disgrazia a chisto portaje
che miezz''a la chiazza te lo ncontraje
se l'afferra po' crovattino
e po' lle dice:"Ah malandrino!
Tu mme lieve la nnammorata
e pigliatella sta mazziata".
Tuffete e taffete a miliune
lle deva paccare e secazzune,
schiaffe, ponie e perepesse,
scoppolune, fecozze e conesse,
scerevecchiune e sicutennosse
e l'ammacca osse e polosse.
Venimmoncenne ch' 'a lo rommore
pariente e amice ascettera fore,
chi co' mazze, cortielle e cortelle
chi co' spate, spatune e spatelle,
chiste co' barre, chille co' spite
chi co' ammennole e chi co' antrite,
chi co' tenaglie e chi co' martielle,
chi co' torrone e sosamielle.
Patre, figlie, marite e mogliere
s'azzuffajeno comm' 'a fere.
A meliune correvano a strisce
de sto partito e de chillo li pisce.
Che bediste de sarde e d'alose!
De palaje e raje petrose!
Sàrache, dientece ed achiate,
scurme, tunne e alletterate!
Pisce palumme e piscatrice,
scuorfene, cernie e alice,
mucchie, ricciòle, musdee e mazzune,
stelle, aluzze e storiune,
merluzze, ruòngole e murene,
capodoglie, orche e vallene,
capitune, aùglie e arenghe,
ciefere, cuocce, tràccene e tenghe.
Treglie, trèmmole, trote e tunne,
fiche, cepolle, laùne e retunne,
purpe, secce e calamare,
pisce spate e stelle de mare,
pisce palumme e pisce martiello,
voccadoro e cecenielle,
capochiuve e guarracine,
cannolicchie, òstreche e ancine,
vòngole, còcciole e patelle,
pisce cane e grancetielle,
marvizze, màrmure e vavose,
vope prene, vedove e spose,
spìnole, spuònole, sierpe e sarpe,
scàuze, 'nzuìccole e co' le scarpe,
sconciglie, gàmmere e ragoste,
vennero nfino co' le poste.
Capitune, sàure e anguille,
pisce gruosse e piccérille,
d'ogne ceto e nazione,
tantille, tante, chhiù tante e tantone!
Quante botte, mamma mia!
che se dèvano, arrassosia!
A centenare le barrate!
A meliune le petrate!
Muorze e pizzeche a beliune!
A deluvio le scuzzune!
Non ve dico che bivo fuoco
se faceva per ogne luoco!
Te, tte, tte, ccà pistulate!
Ttà, ttà, ttà, llà scoppettate!
Ttù, ttù, ttù, ccà li pistune!
Bù, bù, bù, llà li cannune!
Ma de cantà sò già stracquato
e me manca mo lo sciato;
sicché dateme licienzia,
graziosa e bella audienzia,
nfì che sorchio na meza de seje,
co' salute de luje e de leje,
ca se secca lo cannarone
sbacantànnosse lo premmone.